Местная религиозная организация православный приход Богоявленского кафедрального собора г. Кургана Курганской епархии Русской Православной Церкви (Московский Патриархат)

"Се бо отныне ублажат Мя вси роди"

(Лк. 1, 48)

Служба Югской иконе Божией Матери

На Велицей Вечерни:

 

Псаломъ 103, предначинательный:

Благослови, душе моя, Господа; Благословенъ еси, Господи.

Господи Боже мой, возвеличился еси зело. Благословенъ еси, Господи.

На горахъ станутъ воды. Дивна дела Твоя, Господи.

Посреде горъ пройдутъ воды. Дивна дела Твоя, Господи.

Вся премудростию сотворилъ еси. Слава Ти, Господи, сотворившему вся.

Слава, и ныне. Аллилуиа: (трижды).

 

Блаженъ мужъ: 1 антифонъ:

Блаженъ мужъ, иже не иде на советъ нечестивыхъ. Аллилуиа:

Яко весть Господь путь праведныхъ, и путь нечестивыхъ погибнетъ. Аллилуиа:

Работайте Господеви со страхомъ и радуйтеся ему съ трепетомъ. Аллилуиа:

Блажени вси надеющиеся Нань. Аллилуиа:

Воскресни, Господи, спаси мя Боже мой. Аллилуиа:

Господне есть спасение и на людехъ Твоихъ благословение Твое. Аллилуиа:

Слава, и ныне. Аллилуиа: (трижды).

 

На Господи, воззвахъ: стихиры на 8, гласъ 2. Самогласны:

Златая кадильнице,/* ручко, и жезле,/* и светильниче светозарный,/* свитче Божествен­ный,/* въ немже перстомъ Божиимъ написася Слово,/* спаси насъ, Тебе величающихъ.

Даруй намъ помощь, Богородице,*/ на Тя наде­ющимся, верныхъ прибежище.* / Избави отъ бедъ рабы Твоя, Дево,* /на Тя бо по Бозе упование возлагаем.

Владычице, Мати Избавителя,* /приими моление рабовъ Твоихъ,* /аще и недостойне молящихся Тебе,* да молишися за ны къ Рождшемуся изъ Тебе, Владычице мира,/* буди намъ Избавительница.

 

Ины стихиры, гласъ 7:

Украси Твой чертогъ, Чистая,/* и восприими Царя Твоего.*/ Слыши целование, еже от Ангела, Дево.*/ Се бо престолъ Херувимский еси./* Се Царя всехъ Ты прияла еси./* Облакъ света еси, Богородице,* / Духомъ въ души лучи приемши,* юже возвещаетъ велегласно Божественный Гавриилъ, зовый радостно:* Сына Вышняго родиши*/ Духа Божия дивным нашествием.

Украсися, чертоже Святый,*/ Гаврииле, благовествуй Царя Христа,/* целуй Мариамъ, Небесную дверь./* Та бо престолъ Херувимский новотворится,* / Той бо, радуйся, звати достоитъ.* / Облакъ света зрится Девая,*/ носящи Христа, Солнца славы./* Егоже Духъ Божий во утробе Ея/* глаголомъ твоимъ, преславне, вселяетъ,/* живота и смерти и всехъ Владыку.

Возсиявшаго прежде векъ отъ Отца,/* напоследокъ же воплощаема отъ Матере неизреченно,* съ Небесе Гавриилъ къ Девей,— радуйся, Чистая,— зовый:/* о, радуйся, священная радостная Дево,/* Христа Бога во утробе Своей заченши,/* Егоже провидя, Моисей Боговидецъ,/* на Синайстей горе возрадовася,/* Емуже Симеонъ зовый:/* се бо светъ языковъ,*/ Сей Израиля слава и Спасъ душъ нашихъ.

 

Слава, гласъ 6:

Еже радость Ангеломъ приимшая*/ и рождшая Зиждителя Своего,* Дево, спасай Тя величающия.

 

И ныне, гласъ 8:

Богородицу Марию вси воспоемъ:* радуйся, Мати Божия./* Радуйся, лествице одушевленная./* Ра­дуйся, купино неопалимая./* Радуйся, стамно всезлатая.* Радуйся, цвете веры./* Радуйся, жезле прозябый./* Радуйся, златая кадильнице.*/ Радуй­ся, горо Божия, присенная Дево.* Радуйся, разре­шение клятвы первыя Евы./* Радуйся, престоле Господень.* Радуйся, многомолитвенная красото.* Радуйся, Владычице.

 

Входъ. Прокименъ дне. Чтения 3:

 

Бытия чтение.

Изыде Иаковъ отъ студенца клятвеннаго и иде въ Харрань. И обрете место, и спа тамо. Зайде бо солнце, и взятъ отъ камения места того, и положи возглавие себе, и спа на месте ономъ. И сонъ виде, и се лествица утверждена на земли, еяже глава досязаше до Небесъ, и Ангели Божии восхождаху и низхождаху по ней. Господь же утверждашеся на ней и рече: Азъ Богъ Авраамовъ, отца твоего, и Богъ Исааковъ, не бойся: земля, идеже ты спиши на ней, тебе дамъ ю и семени твоему. И будетъ семя твое, яко песокъ земный, и распространится на море, и ливу, и северъ, и на востоки, и возблагословятся о тебе вся колена земная и о семени твоемъ. И се Азъ с тобою, сохраняяй тя на всякомъ пути, аможе аще пойдеши, и возвращу тя в землю сию, яко не имамъ тебе оставити, дондеже сотворити Ми вся, елика глаголахъ тебе. И воста Иаковъ отъ сна своего, и рече: яко есть Господь на месте семъ, азъ же не ведехъ. И убояся, и рече: яко страшно место сие, несть сие, но домъ Божий, и сия врата Небесная.

 

Пророчества Иезекиилева чтение.

Тако глаголетъ Господь: будетъ отъ дне осмаго, и прочее, сотворятъ иереи на олтари всесожжения вашего и яже спасения вашего, и прииму вы, — глаголетъ Адонаи Господь. И обрати мя на путь вратъ святыхъ внешнихъ, зрящихъ на востоки, и сия бяху затворена. И рече Господь ко мне: врата сия затворена будутъ и не отверзутся, и никтоже пройде сквозе ихъ, яко Господь Богъ Израилевъ пройдетъ ими, и будутъ затворена. Яко игуменъ сядетъ в нихъ снести хлебъ, по пути еламскихъ вратъ внидетъ и по пути его изыдетъ. И введе мя по пути вратъ святыхъ, сущихъ къ северу, прямо храму, и видехъ: и се исполнь славы храмъ Господень.

 

Притчей чтение.

Премудрость созда себе домъ и утверди столповъ седмь. Закла своя жертвенная, и раствори въ чаши своей вино, и уготова свою трапезу. Посла своя рабы, созывающи съ высокимъ проповеданиемъ на чашу, глаголющи: иже есть безуменъ, да уклонится ко мне. И требующимъ ума рече: Приидите, ядите мой хлебъ и пийте вино, еже растворихъ вамъ. Оставите безумие, и живи будете, и взыщите разума, да поживете, и исправите разумъ въ ведении. Наказуяй злыя, прииметъ себе безчестие, обличай же нечестиваго, опорочитъ себе, обличение бо нечестивому, раны ему. Не обличай злыхъ, да не возненавидятъ тебе; обличай премудра, и возлюбитъ тя. Даждь премудрому вину, и премудрший будетъ; сказуй праведному, и приложитъ приимати. Начало премудрости — страхъ Господень, и советъ святыхъ — разумъ. Разумети бо законъ помысла есть благаго, симъ бо образомъ многое поживеши время, и приложатся тебе лета живота.

 

На литии стихира, гласъ 8:

Иже на Херувимехъ носимый* и певаемый отъ Сера­фимъ,/* сшелъ еси съ Небесе пророчески, Блаже,/* и вселился еси во утробу Чистыя Богоотроковицы,* / Юже Ангели воспеша тайно:* радуйся, радостная Дево,/* необъятнаго яко Бога во чреве Своемъ приемши паче слова,*/ отъ неверия въ веру миръ преводяща.* Слава Тебе, Христе,* / едине Милостиве и Человеколюбче.

 

Слава, и ныне, гласъ тойже:

Владычице, приими молитву рабъ Твоихъ* / и избави насъ отъ всякия нужды и печали,/* Тебе величающия.

 

На стиховне стихиры, гласъ 2.

Подобенъ: Егда отъ Древа:

Всемъ предстательствуеши, Благая,/* прибега­ющимъ съ верою въ державный Твой покровъ:*/ иного бо не имамы, грешнии, къ Богу*/ въ бедахъ и скорбехъ присно избавления,* /обременени грехи многими, / Мати Бога Вышняго./* Темже Ти припадаемъ:*/ избави отъ всякаго обстояния рабы Твоя.

 

Стихъ:  Помяну имя Твое*/ во всякомъ роде и роде.

Всехъ скорбящихъ радосте,/* и обидимыхъ Заступ­нице,*/ и алчущихъ Питательнице,* странныхъ уте­шение,* обуреваемыхъ приста-нище,* больныхъ посе­щение,/* немощныхъ покровъ и Заступнице,/* жезлъ старости,/* Мати Бога Вышняго/ Ты еси, Пречи­стая,/* потщися, молимся, спастися рабомъ Твоимъ.

 

Стихъ:  Слыши, Дщи, и виждь,*/ и приклони ухо Твое.

Радуйся, Пречистая Дево./* Радуйся, честный скиптре Царя Христа.* Радуйся, прозябшая гроздъ тайный./* Радуйся, двере Небесная и неопалимая купино.* Радуйся, всемирный свете./* Радуйся, всехъ радосте./* Радуйся, верныхъ спасение.* Радуй­ся, Заступнице всехъ христианъ и прибежище, Владычице.

 

Слава, и ныне, гласъ 8:

Радуйся, вселенныя похвало.*/ Радуйся, храме Господень.* Радуйся, горо приосененная.* Радуй­ся, всехъ прибежище.* Радуйся, свещниче златый.* Радуйся, славо православныхъ честная.*/ Радуйся, Марие, Мати Христа Бога.* / Радуйся, раю.* Радуй­ся, Божественная трапезо.* Радуйся, сене.* Радуй­ся, ручко всезлатая./* Радуйся, всехъ упование.

 

 

Тропарь, гласъ 4:

Днесь, яко солнце пресветлое,* возсия намъ на воздусе* всечестная икона Твоя, Владычице,* лучами милости миръ просвещающи,* юже великая Россия,* яко некий даръ Божественный,* свыше благоговейне восприемши,* прославляетъ Тя, Богомати, всехъ Владычицу,* и отъ Тебе рождшагося Христа Бога нашего величаетъ радостно.* Емуже молися, о Госпоже Царице Богородице,* да сохранитъ вся грады и страны христианския невредимы отъ всехъ наветъ вражиихъ* и спасетъ верою покланяющихся Его Божественному* и Твоему Пречистому образу, Дево Неискусобрачная.

 

На Утрени:

 На Богъ Господь: тропарь дважды; Слава, и ныне, тойже.

 Кондакъ акафиста Покрову Пресвятыя Богородицы:

Избранней Предвечнымъ Царемъ, превышшей всякаго создания* Небесе и земли Царице,* пришедшей иногда во Влахернскую церковь на молитву,* достойное поклонение съ благодарениемъ приносяще,* яко во тьме сущии, подъ Твой светящийся омофоръ съ верою и умилениемъ прибегаемъ.* Ты же, яко имущи державу непобедимую,* отъ всякихъ насъ бедъ свобождай, да зовемъ Ти:*

Радуйся, Радосте наша,* покрый насъ отъ всякаго зла честнымъ Твоимъ омофоромъ.

 

По 1 стихологии седаленъ, гласъ 3. Подобенъ: Красоте девства:

Людие благочестивии, правовернии собори хри-етоименитии, приступите верно вси,/ Божествен­ному припадающе Божия Матере образу,/ имже исцеление болящимъ радостно подаваетъ, / уязвляетъ же злославныя яко стрела отъ лука,/ насъ всехъ веселящи световидно/ и благодатию озаряющи молитвами Своими.

 

Слава, и ныне:

Всю Тя Богъ освяти, Деву добрую и непорочную въ женахъ,/ пророки прообразивъ честно, иереи благословивъ, во святая святыхъ всели,/ Ангеломъ воспитавъ, съ Небесе пищу хлебъ подавъ,/ Самъ же Преблагий, Единородное Богъ Слово, вселися въ Тя и плотию пройде изъ Тебе. Темже Ти покланяемся и чтимъ яко воистинну истинную сущую Богородицу.

 

По 2 стихологии седаленъ, гласъ 4. Подобенъ: Удивися:

Да ликовствуетъ светло верныхъ все множество, рыдаетъ же демонское воинство,/ видяще многоименно сияющия праздники Божия Матере, Юже ублажаемъ яко Богоматерь Божественными песньми./ Идеже бо богоприятно славится Преблагословенная Богородица Владычица, Богоизбранная Отроковица,/ неприязни падение, христиан же крепкое утверждение.

 

Слава, и ныне:

О Всеблагословенная Богородице Владычице, Богоизбранная Отроковице,/ светлое пророческое сбытие,/ апостольская похвало и мученическое исповедание и венче, Ангелы чтомая и человеческими роды многопетая,/ и всего мира вожделенная Помощнице,/ избави рабы Твоя осуждения будущаго и езера огненнаго,/ едина Благословенная.

 

Полиелей:

Хвалите имя Господне, хвалите раби Господа. Аллилуиа:
Благословенъ Господь отъ Сиона, живый во Иерусалиме. Аллилуиа:
Исповедайтеся Господеви, яко Благъ, яко въ векъ милость Его. Аллилуиа:
Исповедайтеся Богу Небесному, яко въ векъ милость Его. Аллилуиа:

 

Величание:

Величаемъ Тя,* Пресвятая Дево,* Богоизбранная Отроковице,* и чтимъ образъ Твой святый,* имже точиши исцеления* всемъ съ верою притекающимъ.

 

Псаломъ избранный:

Помяни Господи Давида, и всю кротость его.
Яко клятся Господеви, обещася Богу Иаковлю.
Се слышахомъ я во Евфрафе, обретохомъ я въ поляхъ дубравы.
Преславная глаголашася о Тебе Граде Божий.
Богъ посреде его и не подвижится.
Клятся Господь Давиду истиною, и не отвержется ея.
Отъ плода чрева твоего посажду на престоле твоемъ.
Яко избра Господь Сиона, изволи его въ жилище Себе.
Освятилъ есть селение Свое Вышний.
Святыня и велелепота во святиле Его.
Святъ храмъ Твой, дивенъ въ правде.
Дому Твоему подобаеть святыня Господи въ долготу дний.
Помяну имя Твое во всякомъ роде и роде.
Благословенъ Господь во векъ, и въ векъ века.
Слава, и ныне. Аллилуиа: (трижды).

 

По полиелеи седаленъ, гласъ 1. Подобенъ: Гробъ Твой:

Правоверно чтущия Тя и къ Тебе прибегающия, иконе Твоей святей любезно покланяющияся, / о Божия Мати, спаси / и не даждь насъ въ расхищение сопостатомъ,/ ниже найдутъ на ны вся злая, яже грехи наша уготоваша намъ, ни беззакония наша превзыдутъ главы наша,/ но да Твоя матерняя къ Богу преодолеетъ за ны богоприятная молитва.

 

Слава, и ныне:

Пречистая Твоя икона, Богородице Дево, врачевство всего мира духовное, къ нейже прибегаемъ» Тебе покланяющеся, почитаемъ и лобызаемъ ю, исцелений благодать почерпающе отъ нея, и недуговъ телесных/ъ и душевныхъ страстей Твоими молитвами свобождаемся.

 

Таже степенна, 1 антифонъ 4 гласа:

Отъ юности моея мнози борютъ мя страсти,* но Самъ мя заступи* и спаси, Спасе мой.
Ненавидящи Сиона,* посрамитеся отъ Господа,* яко трава бо огнемъ* будете изхсохше.
Слава, и ныне: Святымъ Духомъ* всяка душа живится,* и чистотою возвышается,* светлеется Троическимъ единствомъ, священнотайне.

 

Прокименъ, гласъ 4: Помяну имя Твое*/ во всякомъ роде и роде.

Стихъ:  Слыши, Дщи, и виждь, и приклони ухо Твое.

Всякое дыхание: Евангелие отъ Луки, зачало 4.

По 50 псалме стихира, гласъ 6:

Не ввери мя человеческому предстательству,* Пресвятая Владычице,/* но приими моление раба Твоего:* скорбь бо обдержитъ мя,* / терпети не могу демонскаго стреляния,*/ покрова не имамъ,/* ниже где прибегну, окаянный,*/ всегда побежда-емь,/ и утешения не имамъ,* разве Тебе, Владычице мира,* упование и предстательство верныхъ,/* не презри моление мое,/ полезно сотвори.

 

Канонъ Пресвятей Богородице, гласъ 8.

 

Песнь 1.

Ирмосъ: Воду прошедъ, яко сушу,* и египетскаго зла избежав,* израильтянинъ вопияше:* Избавителю и Богу нашему поимъ.

О Троице Вседержительная и Единице Трисолнечная, душу мою, и сердце, и умъ, молю, просветивши и благодатию освятивши, к Божественней Твоей любви, Преблагая, возведи и настави благочестно пети благосердие Приснодевы Благословенныя.

Благаго Царя Благая Мати, Иже всемъ благопослушная в прошениихъ и всесильная въ благодеяниихъ! Благодать света Твоего и намъ возсия и облагодати днесь, о Богоблагодатная, песнь Тебе пети начинающия.

Слава: Ликомъ ангельским виновно есть радости Твоего, Владычице, настоящаго торжества славословие, сии бо днесь движутся къ похвалению, мы же, бреннии, что Ти принесем? — точию усердная благодарствия.

И ныне: Архангельский гласъ поемъ Ти: радуйся, Чистая. Аще и недостойни есмы, за благость убо сей приими, Владычице, светомъ милости Твоея насъ просвещающи и благодать всемъ подающи.

 

Инъ канонъ Одигитрии.

Творение монаха Игнатия, гласъ 4:

Песнь 1.

Ирмосъ: Отверзу уста моя,* и наполнятся Духа,* и слово отрыгну Царице Матери,* и явлюся, светло торжествуя,/* и воспою, радуяся, Тоя чудеса.

Радостно, Чистая, ныне наставшее хваление приношаю, радуяся,/ и тихимъ гласомъ, Одигитрие, вопию Ти:/ радуйся и исполни мя разума, пети начинающа.

Христа родившая, радость намъ вечную, о, радуйся, Всепетая, православнымъ надежда, Одигитрие, всепетая Девице,/ радости исполни мя мирови желанныя.

Ликуютъ вси человецы и Ангели всегда, согласно вопиюще на Небеси и на земли, Одигитрие:/ радуйся, Девице, радости бо Рождествомъ Твоимъ всяческая исполнила еси.

Радуйся, Одигитрие, со страхомъ Ти вопиющихъ радости сподоби, Мати сущия радости, избавляющи скорбей всяческихъ,/ и всехъ помилуй, къ Тебе прибегающихъ.

 

Песнь 3.

Ирмосъ: Утверждей въ начале Небеса разумомъ* и землю на водахъ основавый,* на камени мя, Христе, заповедей Твоихъ утверди,* яко несть святъ,* паче Тебе, Едине Человеколюбче.

Грядите, вернии, на преславное видение, зрите на высоте благолепно сияющу пречистымъ Своимъ образомъ Деву Пречистую, насъ благодатно посещающу, благоверно поющихъ: несть пречисты, паче Тебе, Владычице.

Освящается, Богородице, Твоею благодатию всякъ умъ верныхъ и возвышается чуднымъ иконы Твоея пришествиемъ. Юже благочестно почитающихъ и Тебе верно славящихъ сподоби, Владычице, насъ, рабовъ Твоихъ, Вышняго причастия.

Слава: Даждь намъ ненаветно Небесную шествовати стезю, Богоневестная, на Божественная деяния насъ укрепляющи, яко да Твоимъ, Дево, заступлениемъ злокозненнаго пути уклоньшеся, присносущныя славы будемъ общницы.

И ныне: Ангеловъ Трорца, истиннаго Света, Христа, неизреченно изъ Тебе, Богомати, возсиявшаго, лучами омраченныя наша души и сердца просвети и благодатию Твоею, о Благодатная, освяти, к Горняго света рачению наставляющи.

 

Инъ канонъ, песнь 3.

Ирмосъ: Твоя песнословцы, Богородице,* Живый и Независтный Источниче,* ликъ себе совокупльшия, духовно утверди,/* въ Божественней Твоей славе/* венцевъ славы сподоби.

Христа, Вышняго Царя, о, радуйся, непоколебимая чистая и одушевленная палато!/ Радуйся, Одигитрие, радуйся:/ Тобою нерушимъ нашъ градъ сохраняется.

Вместити Егоже не возможе тварь,/ во утробу неискусобрачную, Одигитрие Девице, телесно вместила еси,/ темже Ти, радуйся, поемъ, по долгу величающе.

Радость многопетая мирови,/ радостно Ти поюще присно, вечнующия, Чистая, радости сподобляемся/ Твоими матерними молитвами къ Рождшемуся изъ Тебе, Одигитрие.

Златую Тя стамну, и свещникъ, и жезлъ, и трапезу, Чистая, призываемъ, Одигитрие,/ и гласъ, еже радуйся, Тебе присно привношаемъ/ съ сими же имены.

 

Седаленъ, гласъ 2:

Моление теплое и стена необоримая,/ милости источниче, мирови прибежище, прилежно вопиемъ Ти:/ Богородице Владычице, предвари/ и отъ бедъ избави насъ, Едина вскоре предстательствующая.

 

Песнь 4.

Ирмосъ: Ты моя крепость, Господи,* Ты моя и сила,* Ты мой Богъ, Ты мое радование,* не оставль недра Отча* и нашу нищету посетивъ.* Тем съ пророкомъ Аввакумомъ зову Ти:* силе Твоей слава, Человеколюбче.

Творецъ всехъ и Создатель, вседержительною силою носяй всяческая, образомъ Своимъ Божественнымъ и Твоимъ, Дево, днесь чудоноснымъ преславно прииде, на руку Твоею, Чистая, носимъ, на спасение человекомъ и исцеление.

Неизреченному Божию дарованию — иконе Света Христа и Пречистыя Девы, приидите, вернии, поклонимся и съ любовию припадемъ, вопиюще: ниспосли, о Благодателю, рождшия Тя ради Приснодевы Благосердыя, благодать и милость намъ, рабомъ Твоимъ.

Слава: Ангеловъ Царице, мысленный Кивоте законнаго паче Кивота, пречистый Твой образъ неизреченнными чудесы и благодатьми Богъ украси и прослави и Ангеломъ почитати Того повеле, с нимиже о насъ Ему, о Всепетая, молися, славящихъ спасительное Его смотрение и Твое, еже бо намъ спасение улучити.

И ныне: Яже по благодати дарованная, отъ Бога Помощнице намъ всемъ, христианомъ, Того моли, Всеблагая и Всенепорочная, яко да презритъ наша безчисленная согрешения и избавитъ пламеннаго томления, и тьмы кромешныя, и муки всякия.

 

Инъ канонъ, песнь 4.

Ирмосъ: Седяй въ Славе* на Престоле Божества/* во облаце легце,* прииде Иисусъ Пребожественный,* Нетленною Дланию* и спасе зовущия:/* слава, Христе, силе Твоей.

Радуйся, чудо чудесемъ, Одигитрие Владычице. Радуйся, всемъ радосте градовомъ, и весемъ непобе­димое христианское въ бедахъ хранилище,/ и предградие, и на враги побеждение.

Радуйся, радуйся, людемъ православнымъ похвало, и христолюбивымъ воинствомъ покровъ пребыва­вши всемъ, Царице. Радуйся, Одигитрие, прибежи­ще всемъ намъ и утверждение.

Радуйся, всемъ скорое въ бедахъ избавление. Радуйся, готовое всемъ скорбящимъ утешение. Радуйся, Всепетая, радуйся, Одигитрие всебла-гословенная, всемъ немощнымъ Целительнице.

Радуйся, Еяже величия вся тварь славити убо спешитъ по достоянию,/ но не возмогаетъ, Одигит­рие, и сего ради зоветъ Ти:/ радуйся, Владычице, Боговместимое жилище.

 

Песнь 5.

Ирмосъ: Утренюетъ духъ мой къ Тебе, Боже,* отъ Отца рожденному неизреченно* и воздвиг-нувшему рогъ спасения намъ.

Ты, о Благодатная, въ милостивномъ Твоемъ днесь благоволении боголепнымъ явлениемъ страну нашу благодатно просветила еси и таинственное света Твоего просвещение миру низпослала еси, къ свету Вышния славы, Богородице, верныя возводящи.

Омрачихомся помыслы, отягчихомся грехи, недоумеемъ светоносныя благодати и милости Твоея исповедати, Владычице, но, о Пресвятая Дево, просвети насъ и обогати таинственными Твоими даровании Божественныхъ желаний, къ свету праваго пути направляющи.

Слава: Благочестно отвсюду, о Богомати, къ пречестней Твоей иконе притекающия, и усердно покланяющияся, и верно везде Тя призывающия предвари, отъ бедъ всякихъ спасающи, и лютыхъ недугъ избавляющи и духи лукавыя прогоняющи, тишину и здравие подающи всемъ, Владычице.

И ныне: Лютыми помышлении и скверными воспоминании отъ лукавыхъ враговъ, стужаемыхъ зельне, не остави насъ, ниже презри, Богородительнице, но осени, Твоею благодатию, покрывающи отъ сихъ, и заступающи, и спасающи отъ всехъ ихъ навет, о Богоблаженная.

 

Инъ канонъ, песнь 5.

Ирмосъ: Ужасошася всяческая/* о Божественней славе Твоей:/* Ты бо, Неискусобрачная Дево,/* имела еси во утробе надъ всеми Бога/* и родила еси Безлетнаго Сына,/* всемъ воспевающимъ Тя/* миръ подавающая.

Благостыни бездно и щедротамъ еси, радуйся, Одигитрие Девице, / радуйся, всемъ радость творящи вернымъ. О, радуйся, сущимъ въ бедахъ и скорбя­щимъ пребыстрая Заступнице.

Радуйся, отъ исполнения величия чудесъ Твоихъ зряще, / исполняемся, вси незрящии, слышаще же, вернии./ Темже, радуйся, Тебе присно всюду и вси, Одигитрие, поемъ.

Христа Бога нашего, о, радуйся, Одигитрие, жилище/ и домъ неизреченныя и Пребожест-венныя, Дево, славы Его./ О, радуйся, палато преукрашенная, радуйся, граде одушевленный, присно царствующий!

Радость неоскудную Тя разсмотряюще, яко море, Отроковице,/ Одигитрие Девице, радующеся вси, радуйся, вопиемъ Ти; и поюще, Божествен­ныхъ даровъ невидимо присно отъ Тебе ожидающе.

 

Песнь 6.

Ирмосъ: Молитву пролию ко Господу* и Тому возвещу печали моя,* яко золъ душа моя исполнися* и животъ мой аду приближися,* и молюся яко Иона:* отъ тли, Боже, возведи мя.

Аеръ пространный и земля наша, царице, въ преславном Твоея иконы пришествии чудесъ и Божественныхъ даровъ благодатию Твоею исполнися во утверждение благочестия и всехъ верныхъ, Всепетая, еюже днесь и супостаты низлагаются и славящии Тя крепце утверждаются.

Граде Божий, селение святое, Дево Богоневестная, сохрани отъ сопротивныхъ нахождения и отъ всехъ наветъ вражиихъ святый домъ Твой и вся грады и страны христианския, любовию поющия Тя и верно почитающия пречистый образъ Твой.

Слава: Освящение, здравие и спасение всегда подавай душамъ же и телесемъ нашимъ, о Мати Божия, благочестно покланяющимся иконе Твоей Божественней, и усты и сердцемъ благоговейно со страхомъ целующимъ, и верно отъ души Тя присно славящимъ.

И ныне: Державный покровъ и стену необориму, стяжавши Тя, Приснодево Богородице, упование на Тя с Богомъ возлагаемъ, вернии, и прилежно молимъ: силою Твоею стрелы вражия и козни вся бесовския немощны, яко младенчески, покажи и недействительны, крепкая наша Помощнице.

 

Инъ канонъ, песнь 6.

Ирмосъ: Божественное сие и всечестное/* совершающе празднество,/* Богомудрии, Бого-матере,/* приидите, руками восплещимъ,* / отъ Нея рождшагося Бога славим.

Христа, Чистая, приемлющи, гласъ, еже радуйся, Одигитрие Девице, слышаше,/ Егоже неизречен­но рождши, радуйся, отъ всехъ слышиши всегда.

Радости вся исполнила еси, / вышния и нижния Ты совокупила еси, Одигитрие, темже радостно и согласно ныне небо и вся земля зоветъ Ти.

Вдовам, о, радуйся, Всепетая, и всем сирым, Одигитрие, утешение;/ радуйся, всем источающи нищим богатство неистощимое.

Злата всякаго блистаема и утра солнечнаго светлейши, жилище Христово,/ радуйся, Одигит-рие, радуйся, Девице, радуйся, Невесто Неневестная.

 

Кондакъ, гласъ 8:

Притецемъ, людие, къ Деве Богородице Царице,* благодаряще Христа, Бога нашего,* и, къ Тоя чудотворней иконе умильно взирающе, припадемъ и возопиемъ Ей:* о Владычице Марие, присетивши страну сию* Твоего честнаго образа явлениемъ чудесно,* спасай въ мире и благовременстве страну нашу и вся христианы,* наследники показующи Небесныя жизни,* Тебе бо верно зовемъ: радуйся, Дево, миру спасение.

 

Икосъ:

Простри длани Твоя, имиже всехъ Владыку яко Младенца прияла еси, за множество благости; не остави насъ, всегда надеющихся на Тя, бодренною Твоею молитвою и неисчетною простынею ущедри насъ и подаждь душамъ нашимъ милосердие Твое, во веки источающи:/ Тебе бо имамы, грешнии, Заступницу отъ находящихъ на ны бедъ и золъ./ Но яко имущи милосердия щедроты,/ ускори на молитву и потщися на умоление,/ предстательствующи присно, Богородице, чтущихъ Тя.

 

Песнь 7.

Ирмосъ: Божия снисхождения* огнь устыдеся въ Вавилоне иногда.* Сего ради отроцы въ пещи, радованною ногою,* яко во цветнице, ликующе, пояху:* благословен еси, Боже отецъ нашихъ.

Ангеломъ говейный образъ Твой, Владычице, неизреченною присно благодатию сияетъ и силою, днесь бо того даровании земныя просвещаеши, и къ Небеснымъ наставляеши, и къ вечному животу устрояеши за неизглаголанную Твою благость, Богоблагодатная.

Твоего боголепнаго явления, и преславнаго иконы пришествия, и чудесъ пучины, Чистая, витийствующихъ уста никакоже возмогаютъ исповедати. Мы же, грубии, что возглаголемъ? Точию помилуй и спаси насъ, о Всемилостивая Владычице.

Слава: Известная верныхъ Помощнице и всехъ благихъ Подательнице, приими насъ, верно припадающихъ и любовию вопиющихъ Ти: помилуй насъ, Госпоже, помилуй насъ, якоже днесь, тако и во оный векъ буди намъ Помощница и Заступница.

И ныне: Мати Божия Милосердая, милости Твоея двери днесь отверзи намъ и отъ устъ мысленныхъ волковъ исхити, хотящихъ насъ поглотити и до конца погубити, помилуй, молимъ Тя, о Владычице, помилуй, не отврати посрамленныхъ рабъ Твоихъ.

 

Инъ канонъ, песнь 7.

Ирмосъ: Не послужиша твари Богомудрии/* паче Создавшего,/* но, огненное прещение мужески поправше,* радовахуся, поюще:/* препетый отцевъ Господь и Богъ, благословенъ еси.

Радуйся, радуйся, Богородице Одигитрие, / всехъ и всегда наставляющи верныхъ шествовати ко всякому пути спасительному; радуйся, Владычице, Тобою бо присно избавляемся настоящия варварския беды.

Радуйся, радуйся, Одигитрие, бдящи и молящися о насъ къ Богу,/ и всякия злобы ходатайствомъ Твоимъ, всяческихъ скорбей, Богородительнице, всехъ людей избавляющи.

Радуйся, радуйся, Пресвятая Одигитрие,/ Яже прошения наша къ пользе намъ исполняющи/ и хотящи всемъ присно всегда любодружное благое единство,/ спешное же во изящныхъ.

Радуйся, радуйся, кораблемъ, Одигитрие, нуждно плавающимъ, / избавляющи верныхъ и всемъ избавление отъ всякия скорби/ и недуги пестротныя и медленныя разрешающи вскоре.

 

Песнь 8.

Ирмосъ: Покрываяй водами превыспренняя Своя,* полагаяй морю пределъ песокъ* и содержай вся,* Тя поетъ солнце, Тя славитъ луна,* Тебе приноситъ песнь вся тварь,* яко Содетелю всехъ во веки.

Преславная днесь поюще, Ангеломъ говейной Твоей иконе покланяемся, благоговеюще, о Госпоже Царице, славящия Тя божественною Твоею благодатию осени, и на враги укрепи, и отечество наше мирно соблюди.

Слава: Радости вина, Всеблагословенная, радуйся, Всенепорочная, радуйся, Благодатная, держава наша, и ограждение, и спасительное прибежище, спаси ны, рабы Твоя, не имущия паче Тебе къ Богу помощи, на Тя бо недеемся и Тебе поемъ во веки.

И ныне: Едину Тя жизни нашея стяжахомъ съ Богомъ Хранительницу и крепку Надежду спасения. Молимъ Тя, о Благосердая, и по кончине ходатайствовати не престай о насъ, яко да будущихъ стязаний избавимся и милостива обрящемъ Сына Твоего и Бога въ День Судный.

 

Инъ канонъ, песнь 8.

Ирмосъ: Отроки благочестивыя въ пещи/* Рождество Богородичо спасло есть;/* тогда убо образуемое,/* ныне же  действуемое,* вселенную всю воздвизаетъ пети Тебе:/* Господа пойте, дела,/* и превозносите Его во вся веки.

Радуйся, Всеблагословенная Марие, изъ Тебе бо Всеблагословенный Богъ одеяся во всего мя, человека, и, одеявся, соедини Своему Божеству неизреченнымъ соединениемъ, Дево Одигитрие,/ радуйся, Обрадованная, радосте всего мира.

Радуйся, лукавыхъ духовъ Прогонительнице; pадуйся, Богородице Одигитрие. / Радуйся, яко Тебе Небесная невидимая воинства славословятъ всегда/ и величаютъ яко Матерь Божию бывшую;/ радуйся, Яже нижняя сочтавши съ Вышними.

Радуйся, всехъ Небесныхъ силъ безъ разсуждения превосходящая;/ радуйся, Одигитрие./ Радуйся, всякия твари Бога рождшая, / господствующи ей, Владычице Всепетая;/ радуйся, яко пребываеши Девою, Чистая, и по рождестве.

Радуйся, женамъ всемъ славо, храме преосвященный Бога нашего;/ радуйся, Одигитрие, радуйся, душеспасительная всей вселенней; радуйся, пок­рывающий облаче, небесъ ширшая; радуйся, мироположнице, Божественнаго мира полна.

 

Песнь 9.

Ирмосъ: Ужасеся о семъ Небо,* и земли удивишася концы,* яко Богъ явися человекомъ плотски* и чрево Твое бысть пространнейшее небесъ.* Темъ Тя, Богородице,* Ангеловъ и человекъ чиноначалия величаютъ.

Проста пути по аеру светоприятному икона Твоя, Владычице, стезю проходящи богодвижимо и светолепно, неизследимы стези творящи, верныя въ поднебесней благодатию озари, верою вопиющия: воистинну чистейши всехъ еси, Дево Чистая.

Слова витийствомъ превысокихъ Твоихъ, Чистая, чудесъ никакоже по достоянию украсити удобны есмы, точию усердне молимъ Тя, Царице, да молиши Сына Твоего, Владыку и Царя всехъ, даровавшаго намъ Тебе, Преславную Помощницу, сподобити насъ Небеснаго Твоего Царствия.

Слава: Песнь благодарственнаго пения за неизреченное Твое милосердие, о Богоблагодат-ная, отъ насъ приими, прошения наша въ пользу исполняющи, и къ высоте Горней всехъ возведи, верно бо Ти зовемъ: воистинну вышши всехъ еси, Дево Всенепорочная.

И ныне: Роди вси, радостно блажимъ Тя, Богородице, яко радости вся ны исполнила еси преславнымъ пришествиемъ иконы Твоея, Пречистая. Ейже днесь покланяющеся, умильно молимъ Тя: не забуди, Владычице, Твоихъ рабовъ, сподоби въ будущемъ веце избранныхъ радости.

 

Инъ канонъ, песнь 9.

Ирмосъ: Всякъ земнородный/* да взыграется, Ду­хом просвещаемь,* /да торжествуетъ же Безплотныхъ умовъ естество,/* почитающее священное торже­ство Богоматере,* и да вопиетъ:*/ радуйся, Всеблаженная* Богородице,/ Чистая Приснодево.

Радуйся, свеще, Светъ невечерний понесшая, и въ рождестве Твоемъ многобожия тьму разрушившая,/ и адовы пропасти избавльшая люди./ Ра­дуйся, Одигитрие Богородице, добротъ всехъ Предходатаице.

Радуйся, земле, изъ неяже класъ прозябший Небесный вернымъ,/ и мира всего душегубнаго глада избави, разумная и одушевленная. О, радуйся, винограде, иже гроздъ животный рождшая, Богородице Чистая Одигитрие!

Радуйся, тайныхъ цветовъ прекрасный сущий раю;/ радуйся, Мати Дево, невидимыхъ разумъ/ чистотою страннолепно побеждши, Богородитель-нице. Радуйся, Отроковице, радуйся, Одигитрие,/ всемирное чудо и слышание.

Лето живота нашего прочее сохрани неврежденнo поможениемъ Твоимъ, Дево Отроковице, и сподоби конецъ благий получити намъ, воспевающимъ Тя и взывающимъ: / радуйся, Всеблаженная Богородице, Чистая Одигитрие.

 

Светиленъ:

Да почтится Всепетая Мати Божия,/ жизнь сущую рождшая, Христа Бога нашего,/ райскихъ дверей отверзение, всего мира очищение, къ животу возведение./ Сей есть пророки глаголанный, Тому поклонимся, Богу и Спасу душъ нашихъ.

 

Слава, и ныне:

Приидите, вернии, съ чистою совестию, возвеличимъ Матерь Бога нашего,/ носившую во чреве Божественнаго Младенца Спаса Христа, къ Немуже матернее дерзновение имущи, непрестанно молитъ за ны/ и подаетъ рабомъ Своимъ богатыя милости.

 

На хвалитехъ стихиры на 4, гласъ 4. Подобенъ: Яко добля:

Наставницу Тя заблуждшихъ*/ и пристанище спасительно/* въ пучине, Владычице, и въ бури,/* во искушении же и печалехъ*/ Христосъ Тя всемъ показа,* Сынъ Твой и Богъ,* верно приходящимъ къ Тебе.* Егоже моли отъ злыхъ бедъ избавитися/* ведящимъ Тя, Богородицу, воистинну Наставницу.

Тление и болезнь потребила еси, Всепетая* древнюю всю рождествомъ Твоимъ,/* Животъ миру рождши, смерть разрушивший,/* болезни, Благая, исцеляеши/* верно Твой чудесный образъ воспевающихъ,/* и любовию кланяющихся,/* и чтущихъ Тя, Чистую, Наставницу.

Яко источника Тя, Всепетая, живота вемы/* и яко чудесъ Тя подателя и целебъ,/* страстей душевныхъ же и телесныхъ,/* яко скорое оставление* милости и щедротъ неисчерпаемое море ведяще,* Тебе припадаемъ вси,* просяще отъ скорби разрешения*/ и будущаго мучения.

 

Слава, и ныне, гласъ 8:

Иже на Херувимехъ почиваяй* и певаемый отъ Cepафимъ,*/ сшелъ еси съ Небесе пророчески, Блаже,* и вселился еси во утробу Чистыя Богоотроковицы,* Юже Ангели врспеша тайно:* / радуйся, радостная Дево,/* Необъятнаго яко Бога во чреве Своемъ приемши паче слова,/* отъ неверия въ веру миръ преводяща./* Слава Тебе, Христе,/* едине Милостиве и Человеколюбче.

 

Славословие великое. И отпустъ.

 

На Литургии:

 

Блаженны отъ канона, песни 3 и 6. И прочая служба Пресвятыя Богородицы

 

 

 

Молитва.

Къ кому возопию, Владычице? Къ кому прибегну въ горести моей, аще не къ Тебе, Госпоже Владычице Богородице, Царице Небесная? Кто плачъ мой и воздыхание мое прииметъ, аще не Ты, о Пренепорочная, надеждо христианъ и прибежище греш­ным? Приклони, о Пречистая Владычице, уши Твои къ молению моему. Мати Бога моего, не презри мя, требующа Твоея помощи, услыши стенание мое и вопль сердца моего внуши, о Госпоже Богородице Царице. И подаждь ми радость душев­ную, подкрепи мя, нетерпеливаго, унылаго и нерадиваго къ Твоему хвалению. Вразуми и научи мя, како Тебе молитися подобаетъ, и не отступи отъ мене, Мати Бога моего, за роптание и нетерпение мое, но буди ми покровъ и заступление въ жизни моей, и приведи мя къ тихому пристанищу блаженнаго онаго покоя, и сопричти мя къ лику избраннаго Твоего стада, и тамо удостой мя воспевати и славити Тя во веки. Аминь.

Внесите свой посильный вклад в развитие сайта о Югской иконе Божией Матери

0

Your Cart